Գրիպ և սուր շնչառական վարակներ. Արձանագրվում է աճ

Ի՞նչ հիվանդություն է գրիպը։ Ոմանք շարունակում են թերագնահատել այս հիվանդության լրջությունն ու նենգությունը։ Եւ, չգիտակցելով կամ անտեսելով գրիպի հետևանքների վտանգավորությունը, հաճախ հիվանդությունը տանում են ոտքի վրա` առանց բժշկին դիմելու։

Գրիպը համաճարակներ առաջացնելու հակում ունեցող սեզոնային վիրուսային վարակ է: Համաճարակներն առաջանում են, երբ գրիպի վիրուսի նոր ենթատիպն ախտահարում է վերջինիս նկատմամբ ընկալունակ բնակչությանը: Այն կարող է պատճառ դառնալ աշխարհում բազմաթիվ համաճարակների միաժամանակյա առաջացմանը, ընդհուպ` պանդեմիաների (համավարակ), երբ վարակի թիրախ են դառնում միլիոնավոր մարդիկ, արձանագրվում են մահվան մեծաթիվ դեպքեր: Գրիպի պանդեմիաները հայտնի են արդեն մի քանի հարյուրամյակ: Անցյալ դարում պանդեմիաներ արձանագրվել են 1918թ.  (H1N1 «Իսպանական գրիպ»), 1957թ. (H2N2 «Ասիական գրիպ»), 1968թ. (H3N2 «Հոնգկոնգյան գրիպ») և 2009թ. (H1N1 «Կալիֆորնիական գրիպ կամ խոզի գրիպ»): 

Ի՞նչ է «խոզի գրիպը»

«Խոզի գրիպը» խոզերի շնչուղիների հիվանդություն է, որ հարուցվում է գրիպի Ա տիպի վիրուսով, որը խոզերի շրջանում պարբերաբար գրիպի բռնկումներ է առաջացնում: Գրիպի բոլոր վիրուսների նման, խոզի գրիպի վիրուսը մշտապես փոփոխվում է: Սովորաբար խոզի գրիպի վիրուսներով մարդիկ չեն վարակվում: Սակայն 2009թ. Մեքսիկայում տասնամյա երեխայի մոտ հայտնաբերվեց գրիպի մի ենթատեսակ, որը շատ նման էր խոզի գրիպի վիրուսին և մարդկությանը բացարձակապես հայտնի չէր: 2009թ. մարտին Առողջապահության համաշխարհային կազմակերպության կողմից հայտարարվեց գրիպի նոր ենթատեսակով հարուցված հիվանդության դեպքի մասին: Հետագայում գրիպի այդ նոր` Ա H1N1 ենթատեսակը կամ խոզի գրիպը սկսեց արագ տարածվել` սկզբում ամերիկյան, հետագայում` եվրոպական տարածաշրջանի երկրներում, որն էլ 2009թ. հունիսի 11-ին Առողջապահության համաշխարհային կազմակերպության կողմից գրիպի Ա /H1N1/ վիրուսային վարակի պանդեմիա հայտարարելու հիմք հանդիսացավ: Սակայն 2010 թվականի օգոստոսից ԱՀԿ-ի կողմից այն դասվել է մարդկային սեզոնային գրիպի հասարակ ենթատեսակների շարքին, քանի որ կորցրել է նախկին ագրեսիվությունը և պանդեմիկ ներուժը: 

Վերջին շաբաթվա ընթացքում հանրապետությունում շարունակվում են արձանագրվել սուր շնչառական վարակներով պայմանավորված հիվանդացության աճ` գրեթե 2,5 անգամ (փետրվարի 18-24-ը` 5033, փետրվարի 25-ից մարտի 3-ը` 10688): Այն պայմանավորված է ինչպես առողջության առաջնային պահպանման կազմակերպություններ, այնպես էլ հիվանդանոցներ բնակչության ակտիվ դիմելիությամբ և գրիպի ու սուր շնչառական վարակների սեզոնայնության այժմյան օրինաչափությամբ: 

Չնայած բժշկական օգնության և սպասարկման կազմակերպություններ բարձր դիմելիությանը, նշված հիվանդություններով նվազում են շտապօգնության կանչերը` ինչպես սուր շնչառական վարակների, այնպես էլ թոքաբորբերի դեպքերում: 

Իրականացվող մշտադիտարկման և համաճարակաբանական վերլուծության արդյունքներով` ներկայումս հանրապետության բժշկական օգնության և սպասարկման կազմակերպությունուններում բուժում են ստանում.

Մարզերում` 

• սուր շնչառական վարակներով 214 հիվանդ, 
• թոքաբորբերի թեթև ձևերով 98 հիվանդ, 

Երևանում` 

• սուր շնչառական վարակներով 353 հիվանդ, 
• թոքաբորբի թեթև ձևերով 106 հիվանդ: 

Երևանի ինտենսիվ թերապիայի բաժանմունքներում բուժում է ստանում 20 հիվանդ, որոնց վիճակը հիմնականում գնահատվում է միջին ծանրության։ Միայն մեկ հիվանդի վիճակն է գնահատվում ծանր` պայմանավորված ուղեկցող հիվանդություններով  և ուշ դիմելիությամբ: 

Կազմակերպված և իրականացված լաբորատոր հետազոտությունների արդյունքում արձանագրված դեպքերի գրեթե 70%-ը պայմանավորված է գրիպի Ա տեսակի H1N1 ենթատեսակով, 20%-ը` գրիպի Բ տեսակով: Իրականացված լաբորատոր հետազոտությունների արդյունքում պարզվել է, որ հանրապետությունում շրջանառում են նաև շնչառական այլ վարակների հարուցիչներ` ռեսպիրատոր սինտիցիալ վիրուսներ: 

Համաճարակաբանական վերլուծության արդյունքները վկայում են այն մասին, որ հիվանդացության աճը պայմանավորված է բնակչության կողմից գրիպի և սուր շնչառական վարակների կանխարգելմանն ուղղված միջոցառումների ոչ հետևողական իրականացմամբ (հիվանդների աշխատանքի, ուսումնական հաստատություններ հաճախումը, միջոցառումներին մասնակցությունը և այլն)` չնայած ՀՀ առողջապահության նախարարության բազմաթիվ հորդորներին: 

ՀՀ առողջապահության նախարարության կողմից իրականացվող միջոցառումներ

Համաճարակային իրավիճակի բարդություններից խուսափելու նպատակով, ինչպես նաև հաշվի առնելով գրիպի սեզոնայնությունը և վերջինիս փոխանցման օդակաթիլային մեխանիզմը, ի սկզբանե ձեռնարկված բոլոր միջոցառումները շարունակվում են: 

Հանրապետության բժշկական օգնության և սպասարկման բոլոր կազմակերպությունունները (պոլիկլինիկաներ, հիվանդանոցներ) ապահովված են հակավիրուսային պատրաստուկներով, որոնք բժշկի նշանակումով անվճար տրամադրվում են բնակչությանը։ 

Ամենօրյա մշտադիտարկում է իրականացվում ինչպես բժշկական օգնության և սպասարկման կազմակերպությունուններում, շտապ օգնության կայաններում,  այնպես էլ դպրոցներում, մանկապարտեզներում, որը հնարավորություն է ընձեռում իրավիճակի համաճարակաբանական լիարժեք վերլուծություն կատարել: Դպրոցներում, մանկապարտեզներում պարզաբանվում են երեխաների բացակայության պատճառները, սուր շնչառական վարակների դեպքում իրականացվում են անհրաժեշտ միջոցառումներ։ Միաժամանակ բնակչության շրջանում իրականացվում է առողջ ապրելակերպի քարոզչություն և բժշկահիգիենիկ գիտելիքների տարածում: 

Վրաստան

Վրաստանում «խոզի գրիպից» հղի կին է մահացել, Մարտ 04, 2013 

Վրաստանում «խոզի գրիպիցե մահացության հերթական դեպքն է գրանցվել: Այս անգամ Քութայիսում  H1N1 վարակից 27-ամյա հղի կին է մահացել:

Բժիշկների խոսքով՝ կնոջ մահվան պատճառը ուշացած բուժումն է եղել: Հիվանդը բուժման համար դիմել է վարակի ի հայտ գալուց մեկ շաբաթ անց, հայտնում է «Գռուզիա Online»-ը:

Սա Վրաստանում տվյալ վարակից մահացության արդեն 19-րդ դեպքն է: Հիվանդության զոհերի թվում են երեք հղի կին եւ երեք երեխա: Այս պահին լաբորատոր հաստատում է ստացել հիվանդացության 263 դեպք:

В տեսակի վարակ հայտնաբերվել է 16 հիվանդների մոտ, մնացածները վարակված են H1N1-ով:

Ռուսաստան

Վերջին ժամանակներս Մոսկվայի տարածաշրջանի Օդինցովոյի շրջանում գրիպով հիվանդացած յոթ մարդու մահ է գրանցվել: Նրանցից երկուսի մոտ վիրուսաբաններն ախտորոշել են բարձրապաթոգեն A/H1N1 վիրուսը:  Մնացած հինգը մահացել են թոքերի ծանր բորբոքումից:

Կամչատկայում խոզի գրիպից մահացության դեպք է արձանագրվել:Կամչատկայում խոզի գրիպից մահացության դեպք է արձանագրվել: Երկու շաբաթ Կամչատկայի երկրամասի Ելիզովո շրջանի բնակիչը տանն է եղել, հետո տեղափոխվել է  վերակենդանացման բաժանմունք, որտեղ էլ մահացել է: Այդ մասին գրիպի համաճարակի դեմ պայքարի հանձնաժողովի նիստում տեղեկացրել է Կամչատկայի երկրամասի առողջապահության նախարարի տեղակալ Մարինա Վոլկովան:

Եւս մեկ մահացու դեպք է գրանցվել  Վիլյուչինսկ քաղաքում: Հիվանդը բժշկի էր դիմել հիվանդությունն սկսվելուց երկու օր անց, սակայն նրա մոտ  գրիպի ախտորոշումը դեռեւս չի հաստատվել, հայտնում է rbc-ն:

Ռոսպոտրեբնադզորի շրջանային վարչության ղեկավար Նատալյա Ժդանովան հայտնել է, որ գրիպի եւ սուր շնչառական վարակների հետ կապված իրավիճակը երկրամասում գնահատվում է որպես համաճարակային: Կամչատկայում մեկ ամսվա ընթացքում գրիպով հիվանդացել է 10,5 հազար մարդ: Բժիշկները գրանցել են A(H1N1) խոզի գրիպի 17 դեպք:

47-ամյա Ալեքսեյ Պշեննիկովն ու  59-ամյա Նիկոլայ Գրոմովը Օդինցովոյի Կենտրոնական հիվանդանոցում մահացել են հոսպիտալացումից մի քանի օր անց, հաղորդում է Life News-ը` վկայակոչելով բժկական շրջանակներում իր աղբյուրին:

Ռոսպոտրեբնադզոր տարածաշրջանային բաժնից Life News-ին հայտնել են, որ խոզի գրիպի հետեւանքով մահվան վերաբերյալ ստուգումներ են կատարվում:

Ռոսպոտրեբնադզորից նաեւ հայտնել են, որ խոզի գրիպի վարակի սպառնալիքի պատճառով որոշվել է գրպից մահացած բոլոր անձանց մոտ ստուգել  A/H1N1 վիրուսի առկայությունը:

Այսօր` մարտի 4-ին, ամբողջովին փակվել են Ելիզովո շրջանի բոլոր դպրոցները, եւս վեց ուսումնական հաստատություններ  մասամբ պրոֆիլակտիկայի են անցել:

Հարցեր, պատասխաններ, մեկնաբանություններ